Samiti i ardhshëm mes BE-së dhe Ballkanit Perëndimor do të zhvillohet më 6 dhjetor në Tiranë.
Këtë e ka konfirmuar Presidenti i Këshillit të Europës, Charles Michel përmes një postimi në faqen e tij zyrtare në Twitter.
Ai shprehet se Ballkani Perëndimor është prioritet kyç për Bashkimin Europian, teksa shton se unioni dhe vendet e rajonit kanë nevojë për njëri-tjetrin.
Postimi i Charles Michel:
Ne do të zhvillojmë samitin e ardhshëm BE-Ballkani Perëndimor më 6 dhjetor në Tiranë, Shqipëri për të riafirmuar angazhimin tonë. Ballkani Perëndimor është prioritet kyç për Bashkimin Europian. BE-ja dhe Ballkani Perëndimor kanë nevojë për njëri-tjetrin.
Në 23 qershor të këtij viti u mbajt samiti i BE-së dhe Ballkanit Perëndimor ku 27 liderë të vendeve të unionit u mblodhën në Bruksel.
