Policia e Tiranës ka arrestuar për mashtrim dy persona, të cilët prezantoheshin si jursitë të Kuvendit, e kanë përfituar një shumë lekësh duke premtuar se do të jepnin leje zhvillimore e licencë për të ushtruar aktivitetin e mësimdhënies.
Sipas policisë, në sajë të operacionit të koduar “juristët e rremë”, janë vënë në pranga M. F., 48 vjeçe, banuese në Tiranë (e dënuar më parë për veprën penale të “Mashtrimit”) dhe N. Sh., 24 vjeç, banues në Tiranë.
Në bashkëpunim me njëri-tjetrin, duke u prezantuar si juristë të Kuvendit ata kanë mashtruar dy persona duke iu kërkuar një shumë të konsiderueshme lekësh, me qëllim për t’iu siguruar leje zhvillimore e licencë për ushtrimin e aktivitetit të mësimdhënies në një komunitet fetar.
“Këta shtetas janë kapur në flagrancë nga shërbimet e policisë në momentin që do të takoheshin për t’u kërkuar lekët dy shtetasve të mashtruar. Gjatë arrestimit kanë bërë rezistencë dhe kanë kundërshtuar punonjësit e Policisë”, thotë njoftimi zyrtar i Policisë së Tiranës.
Në cilësinë e provës materiale janë sekuestruar: Një automjet,dy aparate celularë, dokumente të ndryshme.
Materialet procedurale i kaluan për veprime të mëtejshme Prokurorisë pranë Gjykatës së Shkallës së Parë Tiranë në ngarkim të shtetasve të lartpërmendur për veprat penale “Mashtrimi”, “Falsifikimi i dokumenteve”, “Përvetësimi i titujve apo i detyrës shtetërore”, “Goditja për shkak të detyrës” dhe “Kundërshtimi i punonjësit të Policisë”.