Ditën e hënë Presidenti Bajram Begaj, dekretoi datën 14 maj 2023, për mbajtjen e zgjedhjeve lokale. Kreu i Partisë së Lirisë, Ilir Meta thotë se 14 maji do të jetë dita e dërrmimit të regjimit monist në Shqipëri, si edhe dita e triumfit të lirisë të qytetarëve.
Përmes një postimi në facebook, Meta thotë se të shtunën në Konventën Kombëtare, zgjedhet ekipi drejtues që do të udhëheq Partinë e Lirisë drejt fitores të padiskutueshme.
”14 Maji do të jetë dita e dërrmimit të regjimit monist në Shqipëri. 4 vitet e pushtetit vendor monist dhe të paligjshëm si as në vendin më prapambetur të Afrikës do të marrin fund përgjithmonë.
Partia e Lirisë do garantojë jo vetëm rikthimin e pluralizmit në këshillat bashkiakë, por do të jetë fuqia kryesore e zërit të qytetarëve që do zbatojë Llogaridhënien pa asnjë kompromis me interesin publik dhe qytetar.
Të shtunën në Konventën Kombëtare zgjedhim ekipin drejtues që do të udhëheq Partinë e Lirisë drejt Fitores të padiskutueshme. Do të jetë së pari triumfi i lirisë të qytetarëve të nëpërkëmbur, të vjedhur, të intimiduar dhe të padëgjuar në këto 4 vitet e pushtetit absolut monist të Rilindjes”.