Këtë të martë, kryeprokurori i përgjithshëm Olsian Çelaj foli me shqetësim për fatin e hetimeve për ndërtimet pa leje apo grabitjet e pronave, kryesisht në bregdet. Për të duhet të marrë fund që hetimet që nisin me bujë të mbulohen nga pluhuri i harresës.
“Prokuroria duhet të tregojë se është një institucion serioz dhe i aftë, që i shërben mbrojtjes së interesit publik, përmes hetimeve që duhet te përfshijnë si autorët, ashtu edhe të gjithë personat që kanë pasur për detyrë kontrollin e territorit e që me veprime apo mosveprime kanë lejuar ngritjen e këtyre ndërtimeve.
Të gjithë jemi të ndërgjegjshëm se ka një mosbesim të thellë e të përhapur ndaj punës sonë. Është e pafalshme që mosfunksionimi si duhet i sistemit të drejtësisë t’u përcjellë qytetarëve ndjenjën e pafuqisë dhe dorëzimit përballë të keqes, teksa ata shohin se si disa individë ia dalin të sfidojnë haptazi institucionet dhe ligjet e vendit.
Hetimet kanë disa muaj që kanë nisur dhe publiku pret përgjigje të qarta për dëmin dhe autorët. Nuk mund të vazhdohet më me hetime të bujshme që i mbulon pluhuri i harresës. Duhet të dalin përgjegjësit në të gjitha nivelet, kushdo qofshin ata, dhe rezultatet duhet t’i bëhen të ditura publikut”.