Drafti që ekspertët e Reformës Zgjedhore kanë dorëzuar në komisionin e posaçëm ka shkaktuar debat mes deputetëve të opozitës. Për republikanin Fatmir Mediu, drafti është i panjohur për ta dhe nuk mund të diskutojnë mbi një dokument me të cilin ende nuk janë njohur. Ai madje ka kritikuar edhe kreun e grupit parlamentar të PD-së, Enkelejd Alibeajn, duke i thënë se është bashkëkryetar i opozitës, ndaj duhet të konsultohen para se të shkojnë në mbledhje.
Mediu: Grupi i ekspertëve nuk mund të vijnë këtu pa i parë dhe pa i diskutuar këto. Tjetra e kam me ju zoti Alibeaj, ju jeni aty si përfaqësues i opozitës, dhe nuk mund të vijmë këtu pa u konsultuar paraprakisht bashkë. Të mos vijmë këtu e të bëjmë diskutim njëri në një anë, tjetri në anën tjetër.
Alibeaj: Keni ekspertët tuaj, ekspertëve tuaj i kemi çuar materialin. Duhet punë edhe nga ekspertiza juaj, vetëm në këtë mënyrë mund të jemi të unifikuar, që edhe ekspertët tuaj ti shohin ti kritikojnë ti pasurojnë propozimet. Nuk e pranoj që eksperti i PD-së të bëjë punën dhe të tjerët të rrijnë e të shohin e të thonë që nuk kemi kohë.
Vasili: Unë as kisha dëshirë të krijoja acarim, më vjen keq që po ta them haptaz që ti nuk di cfarë flet kur unë citoj konstatimet e OSBE ty të duket zgjatim i një konference. Nëse ke marrë angazhim të bësh një militant që nuk ha arsye gjej një vend tjetër. Unë citova probleme madhore që kanë të bëjnë me hetimin e zgjedhjeve.
Alibeaj: Unë përfaqësoj aq sa mundem opozitën, nuk kam asgjë për të pasur kufizime se ne na bashkon një gjë si opozitë, që në këtë vend këta zgjedhjet i vjedhin, shqiparët nuk votojnë lirshëm dhe nuk kemi pse të kemi asnjë diferencë në këtë pikë, por nuk pranoj që eksperti i PD të jetë ai që bën punën dhe pjesa tjetër ta sodisë e të vijnë këtu e të thonë nuk kemi kohë. Për ne përdorimi i administratës, buxhetit janë çështje që ne e dimë që janë përdorur nga mazhoranca në zgjedhjet e 2021, dhe kjo është ajo që duhet t’i adresojmë.