Në Mollas të Ersekës, kryeministri Edi Rama po zhvillon një bashkëbisedim me fermerët, blegtorët e njerëzit e punës, mbi investimet që ka bërë qeveria dhe vëmendjen e rritur ndaj tyre përmes skemave mbështetëse, të dedikuara për reduktimin e kostove të prodhimit, rritjen e punësimit dhe zhvillimin e ekonomisë rurale. Rama tha se fermerët dhe ecuria e tyre është mjaft e suksesshme, dhe kjo e gjitha kjo është e dukshme nga shifrat.
”Realiteti me gjithë vështirësitë e veta me një karakter të trashëguar prej shumë e shumë viteve, është një realitet që ndryshon për mirë natyrisht. Atyre të cilëve si ju, i kushtohen dhe përpiqen dhe nuk dorëzohen përpara vështirësive të kësaj pune, ua kthen gjithnjë e më mirë.
Këtu në këtë zonë ka një traditë, por ka dhe një vazhdimësi rritjeje. Ashtu sikurse dhe sesi shifrat flasin, që puna juaj është e mundimshme. Fakti që këtu janë shitur 80% të mollëve flet shumë. Flet për të ardhurat, por edhe për atë pjesë gjithnjë e më të vogël që t’i përshtatet logjikës së tregut. Tregut duhet t’i adaptohemi me kërkesat e tij. Është për të ardhur keq kur fermerët hedhin prodhimet e tyre.
Është e rëndësishme që pamjet e realitetit të jenë të plota për të kuptuar secili vendin e tij dhe për të kuptuar se ku është rruga e suksesit. Dhe sot, shumë fermerë janë në rrugën e suksesit. Fakti që ka një tendencë të re kthimi në fshat nga një numër i vogël të rinjsh por që po rritet hap pas hapi flet shumë për të ardhmen e jo shumë viteve larg. Normalisht që ka kushte që duhet të plotësohen e do të plotësohen hap pas hapi. Siç është kushti për të ruajtur rezervat frigoriferike. Bashkia duhet të shërbejë që të jetë dhe garant për punën e fermerëve, pra mes bashkisë dhe fermerëve të ketë një ortakëri”.