Negociatat mes dy grupeve në PD, që nisën në një kafene përballë Kuvendit, u mbyllën si muhabet kafenesh, pa bereqet. Të parët që lajmëruan mosmarrëveshjen mbrëmjen e së martës, ishin grupimi i Alibeajt, që nëpërmjet një qëndrimi zyrtar, njoftuan për përgatitjen e zgjedhjeve vendore të vetëm.
“Grupi Parlamentar i Partisë Demokratike ka kërkuar të informohet Kryesia e Partisë Demokratike, për t’i hapur rrugë krijimit të të gjitha kushteve për përgatitjen dhe pjesëmarrjen e Partisë Demokratike në zgjedhjet e ardhshme vendore”, u deklarua nga grupi Alibeaj.
Sali Berisha vuri theksin tek statuti, dhe nuk i kurseu ”kërcënimet”. “Statuti i 11 dhjetorit është kushtetuta historike e pathyeshme e PD së rithemeluar. Opozita nuk mund të pengohet nga asgjë për të firmosur fitoren në këto zgjedhje. Zotërinjtë të cilët janë një grup deputetësh u ftuan pa asnjë lloj paragjykimi dhe prapamendimi që të garonin për çdo post në këto bashki dhe të paraqisnin kandidatura në përputhje me statutin të krijonin fraksione. Ata nuk duan as statutin as primaret e as fraksionet. Me flamurin e PD-së kush merret s’ika bërë mirë hesapet”.
Thembra e Akilit është statuti. Grupimi i Alibeajt thotë se këmbëngulja në këtë pikë minoi bisedimet. Ndryshimet statutore, grupi i Alibeajt i ka çuar dhe në Gjykatën e Apelit, e cila pritet të marrë vendim për çështjen brenda kësaj jave. Zgjedhjet lokale të 14 majit do të kenë skenarin e 6 marsit, ku palët dolën me 2 kandidatura të ndryshme para elektoratit.