Deputeti i PD Belind Këlliçi ka dorëzuar një padi në Gjykatë ndaj 2 policëve, që sipas tij e kanë dhunuar gjatë protestës për Teatrin Kombëtar.
Në një komunikim për mediat, ai u shpreh se kur kanë kaluar dy vjet nga protesta, tashmë janë identifikuar dy policët, të cilët tha ai do të përballen me ligjin.
Këlliçi u shpreh se padinë e bën për t’i dhënë një mesazh të qartë Policisë së Shtetit se nuk mund të sillet në mënyrë arrogante ndaj qytetarëve.
“Sot dy vite e 6 muaj pas asaj mbrëmje paraqitem për shkak se janë gjetur policët që më kanë marrë me dhunë atë natë dhe do të shkojnë në gjyq. Ata policë që kanë shkelur ligjin duhet të mbajnë përgjegjësi. Qytetarët janë të barabartë dhe nuk duhet të dhunohen. Sot u shtyu seanca për në muajin dhjetor, për shkak se mungonte një nga të pandehurit. Jam i bindur se gjatë zhvillimit të këtij procesi do të njiheni me një surprizë dhe do të shikoni çudira gjatë këtij procesi. Unë do ti shkoj deri në fund kësaj çështje, sepse nuk isha vetëm unë në qeli. Unë këtë kallëzim e kam bërë për ti dhënë një mesazh të qartë Policisë së Shtetit sepse policia nuk mund të kete këtë sjellje barbare ndaj qytetarëve të Tiranës”, tha deputeti i PD.