Anëtari i Kryesisë së Partisë së Lirisë, Edmond Panariti, në një intervistë për ‘Ora News’ thotë se protesta e thirrur nga opozita nuk është protestë politike por protestë e qytetarëve të një vendi, situata e të cilit është shumë e rëndë.
Ai thotë se Shqipëria po zbrazet me një ritëm të shpejtë, jashtë çdo parashikimi.
Panariti: Protesta në radhë të parë është protestë qytetare pasi vendi ndodhet në një situatë shumë të rënduar. Vendi po zbrazet, njerëzit po largohen në dëshpërim dhe nuk e kam menduar se kjo do të ndodhte me një shpejtësi të tillë pavarësisht parashikimeve. Bëhet fjalë për një hemoragji që tregon se njerëzit e kanë humbur shpresën dhe besimin se ky vend mund të garantojë të ardhmen e tyre. Sa i takon shërbimit shëndetësor dhe arsimit, Shqipëria renditet e fundit në botë me vendet e Afrikës Qëndrore. Për të penguar që vendi të zbrazet, të shkretohet duhet tu bëjmë një apel qytetarëve. Një vend pa banorë vë në pikëpyetje dhe ekzistencën e tij.
Ai shpreh bindjen se qytetarët do tu përgjigjen me pjesëmarrje masive nesër por edhe me votë në zgjedhjet vendore të 14 majit 2023.
Panariti: Koalicioni opozitar do të mbështetje të jashtëzakonshme të qytetarëve. Do ti përgjigjen me pjesëmarrje masive në protestë nesër por dhe në sfidën e ardhshme elektorale, koalicioni opozitar do të ketë një fitore spektakolare. Do të marrë kontrollin e shumicës së bashkive dhe këshillave bashkiakë.