11 persona, anëtarë të një bande shqiptare të trafikut të drogës, janë arrestuar nga policia spanjolle. Lënda narkotike po transportohej në disa makina nga Madridi.
Si rezultat i operacionit, u sekuestruan 13 kilogramë heroinë.
Hetimet nisën në fillim të vitit 2022, pasi autoritetet spanjolle zbuluan një person që merrej me shitjen e sasive të konsiderueshme heroine. Metoda e gjetur për fshehjen e drogës ishte aq e pazakontë, sa u desh të zbulohej me rreze X.
Deri më tani, janë zbuluar plot 10 automjete, brenda të cilave ishte fshehur heroinë.
Përveç heroinës, autoritetet konfiskuan një kilogram hashash, gjysmë kilogram marihuanë, 57 mijë euro para cash, 900 dollarë, peshore precize dhe mjete për trajtimin e drogës.