Partia e Lirisë ka reaguar për dënimin e poetes së njohur, Mimoza Ahmeti, e cila do të bëjë 40 orë punë publike, pasi është shpallur fajtore për shkak se riparoi shtëpinë e dëmtuar nga tërmeti.
Sekretari i Përgjithshëm i PL-së, Tedi Blushi thotë se ky është krim, ndërsa shteti i Ramës vepron me dy standarde, pasi godet të dobëtit, ndërsa oligarkët nuk i prek.
Sipas tij, klientët e Qeverisë amnistohen për kate, pallate dhe kulla pa leje.
“Dënimi i poetes së mirënjohur Mimoza Ahmeti për rindërtimin e shtëpisë së dëmtuar nga tërmeti, kur klientët e Qeverisë amnistohen për kate, pallate dhe kulla pa leje është krimi i radhës i shëmtuar i shtetit me dy standarde të Edi Ramës.
Zelli i drejtësisë së “Rilindjes” për të goditur pa mëshirë intelektualët e më të dobëtit, por jo oligarkët dhe krimin që pastrojnë paratë me monstrat e betonit është në fakt modeli qeverisës shtypës që ka instaluar Edi Rama!
Mesazhi i qindra mijëra shqiptarëve në 12 Nëntor ishte i qartë: Ky shtet që po degradon përditë në një regjim hajdut dhe shtypës do të shembet shumë shpejt përpara vullnetit të qytetarëve të lirë! Triumfi është i sigurtë”, shkruan Blushi.