Teksa u përlot për ikjen nga politika e mikeshës së saj, deputetja e PD-së, Flutura Açka duket se po e mendon lënien e mandatit të deputetes siç bëri një javë më parë Grida Duma. Ajo thotë se nuk e gjen veten në PD, pasi nuk është ujëra të sigurta.
“Lotët e mi ishin goditje e momentit. Dija diçka, por nuk ma merrte mendja që e kishte marrë vendimin, edhe zëri i dridhur i Gridës dhe të gjitha bashkë, kjo ishte arsyeja e emocionit. Është vendim personal i saj. Ajo vazhdon të jetë në politikë dhe nga ai front. Kam përshtypjen se mjedisi në PD nuk është akoma aq i shtruar sa të jetë dashamirës. Kjo është një nga arsyet mendoj unë. As unë vetë nuk e gjej veten, nuk jam në ujëra aq të sigurta. Projeksioni im ishte ndryshe”, tha Açka e ftuar mbrëmjen e së mërkurës në “Goca dhe Gra”.
E pyetur se për çfarë do ta linte politikën, ajo tregoi se do ta bënte “vetëm për librin”. Mbetet për t’u parë nëse Açka do të marrë të njëjtin vendim si Duma, në një kohë kur deputetët e opozitës kanë përplasje të vazhdueshme me njëri-tjetrin, dhe nuk arrijnë të gjejnë gjuhën e përbashkët.