A do ta mbajë PD dhe opozita protestën e radhës më 6 dhjetor, ditë kur në Tiranë do të mbahet për herë të parë samiti i BE-Ballkani Perëndimor? Kreu i grupit parlamentar të Partisë Socialiste, Taulant Balla, thotë se thirrjet për mitingje në një ditë feste, bien tërësisht ndesh me traditat më të mira të shqiptarëve.
“Unë besoj që çdo qytetar shqiptar e kupton që halli i Saliut është aq i madh, saqë një ditë mikpritjeje të shqiptarëve për miqtë, për një samit që nuk ka ndodhur kurrë në vendin tonë, thërret një miting antievropian”, tha Balla në një prononcim për gazetarët.
Për të kjo protestë mund të bëhej në të gjitha ditët e tjera të vitit, vetëm jo më datë 6 dhjetor 2022. “Në raste të tilla ka një nivel të rritur të sigurisë, për shkak të atyre që vijnë. Shqiptari nuk e ka për zakon që ta presë mikun me protesta, por e ka zakon ta presë siç duhet. Siç u prit George Bush në vitin 2007 dhe të gjithë miqtë e tjerë të Shqipërisë”.