Finalizohet operacioni i koduar “Drini i Zi”. Në kuadër të këtij operacioni uniformat blu kanë arrestuar një 33-vjeçar, pasi u kap duke transportuar kundrejt 150 eurove katër emigrantë.
Gjithashtu bëhet me dije se janë sekuestruar automjeti më të cilin transportoheshin emigrantët.
Njoftimi:
Kukës/Finalizohet operacioni policor i koduar “Drini i Zi”, i zhvilluar nga shërbimet e Policisë Kufitare të DVKM Kukës, në bashkëpunim me shërbimet e DVP Kukës.
Arrestohet në flagrancë një 33-vjeçar që u kap duke transportuar kundrejt 150 eurove për person, 4 emigrantë, për të kaluar kufirin në mënyrë të kundërligjshme.
Sekuestrohen automjeti me të cilin transportoheshin emigrantët dhe një shumë parash, e dyshuar e përfituar nga kjo veprimtari kriminale.
Shërbimet e Policisë Kufitare të DVKM Kukës, në bashkëpunim me shërbimet e Sektorit për Hetimin e Trafiqeve të Paligjshme dhe Narkotikëve, të DVP Kukës, në vijim të punës 24/7, në terren, me qëllim parandalimin, evidentimin dhe goditjen e aktivitetit kriminal të dhënies ndihmë kundrejt fitimit, emigrantëve nga vendet e treta, me qëllim kalimin e paligjshëm të kufirit shtetëror, kanë organizuar dhe finalizuar operacionin policor të koduar “Drini i Zi”.
Si rezultat i këtij operacioni, u arrestua në flagrancë shtetasi E. A., 33 vjeç, banues në Tiranë.
33-vjeçari u kap në flagrancë, në vendin e quajtur “Ura e Drinit të Zi”, duke transportuar me automjet, kundrejt 150 eurove për person, 4 emigrantë, me qëllim kalimin e kufirit në mënyrë të kundërligjshme.
Në cilësinë e provës materiale, u sekuestruan automjeti me të cilin transportoheshin emigrantët dhe një shumë parash, e dyshuar e përfituar nga kjo veprimtari kriminale.
Materialet i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme.