Nënkryetari i Partisë së Lirisë, Petrit Vasili e cilësoi protestën e 6 dhjetorit një manifest qytetar paqësor, datë në të cilën do mbahet në Tiranë dhe samiti BE-Ballkani Perëndimor.
I ftuar në rubrikën ‘Opinion’ në ‘News24’ Vasili teksa nxori detaje nga takimi i Metës sot me Berishën në selinë e PD-së, theksoi se dy liderët folën për organizimin e protestës.
Vasili tha se në këtë protestë do të përcillen mesazhet e forta të qytetarëve për liderët e Europës, kundër qeverisë që ai e cilëson të korruptuar. Mes të tjerash Vasili i mëshon faktit se ajo protestë do të jetë paqësore.
“Sot ishte një ndër takimet e vazhdueshme Meta-Berisha. Ne takim u diskutua për protestën e 6 dhjetorit. Është një protestë shumë e rëndësishme. Mesazhi është që të përcjellë një protestë thellësisht paqësore. Atë që evropianët e kanë sanksionuar në rezolutën e tyre të 19 majit, dhe qeveria do që t’i shmanget. Ne do e themi me zë të lartë në shesh atë rezolutë. Është folur për portin e Durrësit, për pastrimin e parave. Një seri mesazhet që kanë rënë në vesh të shurdhër. Do jetë një manifestim i shkëlqyer paqësor. Njerëzit janë përleshur në botë, po ky nuk është dimensioni ynë.”, tha Vasili.