Ministri i Jashtëm grek, Nikos Dendias, është shprehur përpara vizitës së tij në Tiranë në kuadër të Samitit të BE-së, se Greqia ka interes për zgjidhjen e çështjeve të pazgjidhura bazuar në të drejtën ndërkombëtare.
“Populli grek dhe shqiptar janë të lidhur me lidhje tradicionale miqësie. Greqia dhe Shqipëria ndajnë shumë më tepër se kufijtë e tyre të përbashkët. Ata ndajnë një histori të gjatë ndërveprimesh dhe shkëmbimesh. Skënderbeu është një hero kombëtar në të dy vendet tona.
Të dy vendet kanë vuajtur nga fashizmi gjatë Luftës së Dytë Botërore. Ata janë gjithashtu të lidhur, falë pranisë së minoritetit etnik grek në Shqipëri, si dhe numrit të madh të shqiptarëve që jetojnë dhe punojnë në Greqi”, deklaroi Dendias në mesazhin e tij përshëndetës për 110 vjetorin e Pavarësisë së Shqipërisë.