Polumbarët e patën të pamundur që të kërkonin në ujërat e liqenit të Pogradecit për shkak të motit të keq dhe të temperaturave të acarta. Kërkimet për trupin e peshkatarit Gëzim Seitllari, i humbur prej datës 31 dhjetor do të rinisin sapo temperaturat të përmirësohen.
Polumbarët nga Tirana kanë shkuar në Pogradec në ndihmë të kërkimeve, por pa mundur dot të zhyten sot për shkak të temperaturave nën zero, që e bëjnë të papërballueshme situatën gjatë zhytjes. Kështu kërkimet kanë vijuar me varka, me shpresën se trupi do të ketë mundur të dalë në bregun e liqenit.
Gëzim Seitllari, 57 vjeç, doli për peshkim në orën 5 të mëngjesit të 31 dhjetorit, e prej atëherë nuk është kthyer më në banesë. Të mërkurën në mëngjes, varka e peshkatarit është gjetur në thellësi të liqenit, së bashku me disa nga rrobat e tij në zonën e Hudenishtit, çfarë ka shtuar dyshimet se peshkatari është mbytur.