Davide Pecorelli, italiani që inskenoi vdekjen e tij, është vënë në prangat e autoriteteve italiane dhe pritet të ekstradohet drejt Shqipërisë.
Pecorelli, i cili në janar 2021, besohej se kishte vdekur në Shqipëri brenda një makine të përpirë nga flakët, u shfaq nëntë muaj më vonë në ujërat e ishullit Montecristo, ndërsa përpiqej të ankorohej me gomone.
Prokuroria e Pukës mbylli në tetor hetimet për të dyshuarin për mashtrim, përdhosje varresh dhe shkatërrim prone me zjarr, veprime që pengojnë zbulimin e së vërtetës, kalim të paligjshëm të kufirit shtetëror.
Autoriteti gjyqësor shqiptar është i bindur se Pecorelli u ndihmua për të organizuar inskenimin e vdekjes së tij.
Sipas asaj që është rikonstruktuar, Pecorelli për t’iu shpëtuar borxheve financiare të kontraktuara në Itali, i kishte vënë flakën një makine që kishte marrë me qira në fshatin Rrasë të Pukës, brenda së cilës kishte vendosur mbetje eshtrash njerëzish për të sajuar vdekjen e vet.