Situata këtë të dielë paraqitet më e qetë në veri të Kosovës, por rrugët vijojnë që të jenë të bllokuara. Mbrëmjen e së shtunës u shënuan shpërthimeve dhe të shtënave me armë. KFOR-i dhe EULEX-i janë duke e monitoruar situatën. Pak njerëz shihen aktualisht në barrikadën në Rudarë të Zveçanit.
Pasditen e djeshme në Rudarë, serbët lokalë u mblodhën në shenjë pakënaqësie për arrestimin e ish-pjesëtarit të Policisë së Kosovës, Dejan Pantiq nga radhët e komunitetit serb. Ata vendosën barrikada në këtë vend. Policia e Kosovës mbylli rrugët që çojnë për në pikëkalimet kufitare Jarinjë dhe Bërnjak që lidhin Kosovën dhe Serbinë, duke e konsideruar këtë vendim si masë paraprake të sigurisë.
Dy shpërthime të fuqishme, një rreth orës 1:30 pas mesnatës dhe tjetra në ora 3:00 janë dëgjuar afër Zveçanit, ndërsa në drejtim të Zubin Potokut ka pasur edhe të shtëna armësh. Barrikadat janë përforcuar gjatë natës me makineri të rëndë, sidomos në fshatin Soqanicë dhe Rudare.