Situata në qarkun e Shkodrës nuk është e mirë përshkak të reshjeve të fundit. Autoriteti Rrugor i veriut njofton se në segmentin Dedaj-Bogë, pikërisht në përroin e Thatë, km 5, ka rritje të nivelit dhe si pasojë dalje të përroit në rruge.
Niveli ujit është i paqëndrueshëm dhe rruga momentalisht është e bllokuar, ku janë vendosur sinjalistika që banorët të kalojnë në rrugë alternative. Bëhet fjalë për aksin rrugor, ku dy javë më parë humbën jetën babë e bir në tentativë për të kaluar rrugën.
Pjesa tjetër e akseve rrugorë paraqitet pa probleme. Kuota në Lumin Drin është 6.00, me rritje 60 cm ndërsa kuota në Liqen 7.95 me rritje 50cm. Në njësinë administrative Ana e Malit janë të përmbytura një sipërfaqe prej 400 hektarësh. Pa energji elektrike janë pjesa më e njësisë administrative Ana e Malit si dhe fshatrat Beltojë Mali Hebe në njësinë Berdicë.