Kreu i Partisë Demokratike, Sali Berisha ka zhvilluar një takim me fituesit e Primareve për zgjedhjet e 14 majit. Sipas tij, ata kanë transformuar, ridimensionuar pluralitetin në PD, por edhe në Shqipëri në tërësi. Këtë takim, Berisha e quajti një ngjarje tepër të veçantë, pasi si kurrë ndonjëherë në selinë e PD-së janë ulur kandidatë për qytetarë të parë të bashkive të vendit.
“Nuk ka parti më të hapur sesa partitë që bazohen në garën, konkurrencën e lirë dhe të ndershme të zgjedhjes së institucioneve të saj. Nuk ka parti më të hapur sesa një parti që vendos pluralitetin dhe votën e lirë në themel të zgjedhjes së qeveritarëve të saj vendorë, qendrorë dhe drejtuesve të saj.
Nuk ka parti më të hapur në mënyrën më demokratike sesa një parti që përveç anëtarëve të vet, fton të votojnë edhe simpatizantët e saj. Pranon në garë jo vetëm personalitete të veta, por edhe prurje të shquara nga shoqëria civile, bota akademike. Të gjitha këto kanë ndodhur në këtë garë. Nuk them se ishte e përsosur, por këto ishin risi të pamohueshme të saj.
Secili prej jush ka kontributin, investimin në këtë realitet të ri të krijuar në PD, por edhe në Shqipëri. Secili kandidat, që doli i dytë apo i tretë në garë, ka meritën e madhe se firmosi pluralitetin brenda në PD. Por një aspekt tjetër jashtëzakonisht i rëndësishëm, thelbësor i garës, qëndron në përmbysjen”.
Nga fjalimi i Berishës nuk kanë munguar as emocionet. Disa nga kandidatët e pranishëm u prekën nga fjalët e ndjera të kryetarit të PD-së, i cili i falënderoi për punën e tyre, mes tyre edhe Belind Këlliçi, i cili u përlot teksa kreu i PD-së po mbante fjalim. Deputeti ende i PD-së, është kandidati për Bashkinë e Tiranës.