Prokuroria e Posaçme ka kërkuar 19 vjet burg për Gentian Malindin, i akuzuar për trafikimin e 137 kg drogë, sasi e kapur në portin e Durrësit. Për shkak të gjykimit të shkurtuar, dënimi shkon në 12 vjet e 8 muaj.
46-vjeçari u arrestua në Vlorë më 27 tetor me akuzat për veprat penale “Trafikimi i narkotikëve”, kryer në bashkëpunim, “Grupi i strukturuar kriminal” dhe “Kryerja e veprave penale nga organizata kriminale dhe grup i strukturuar kriminal”, në kuadër të operacionit ndërkombëtar të koduar “Kuito”.
Në bashkëpunim me shtetasit A. B., 53 vjeç dhe A. M., 35 vjeç, dyshohet se ai do të priste në Durrës 137 kg lëndë narkotike kokainë, e cila u sekuestrua gjatë operacionit.
Operacioni ndërkombëtar i koduar “Kuito” u finalizua në shtator 2019, nga Policia e Shtetit, në bashkëpunim me autoritetet ligjzbatuese greke, në koordinim me zyrën e DEA-s në Athinë, nën drejtimin e Prokurorisë pranë Gjykatës së Shkallës së Parë për Krimet e Rënda Tiranë.