Ish-kreu i bandës famëkeqe të Lushnjes, Aldo Bare, do të vuajë dënimin burg të përjetshëm. Gjykata e Lartë ka lënë në fuqi vendimin, dhe vjen 10 vite pas vendimit të marrë nga gjykata e Apelit në 2012-tën. Bare bëri rekurs të vendimit me burgim të përjetshëm. Prej vitesh ai vuan dënimin në burgun e sigurisë së Lartë në Peqin.
Aldo Bare u arrestua në Turqi në vitin 2006. Ndërsa kërkesa për ekstradimin e tij drejt Shqipërisë u pranua në fundin e vitit 2009, kur ish-kreu i bandës kriminale të Lushnjës mbërriti me charter në Aeroportin ndërkombëtar “Nënë Tereza” nën mbikëqyrjen e forcave të shumta të sigurisë.
Alfred Shkurti, ish-speciali i forcave RENEA, ose i njohur ndryshe si Aldo Bare, hyri në botën e krimit në vitin 1997, pasi atij i vrau vëllanë banda e Artur Dajës, gjatë një përleshje me armë zjarri. Pas vrasjes se Ramadan Shkurtit, në Lushnjë nisi të operonte banda e Aldo Bares së cilës Drejtësia i numëron më shumë se njëzet vrasje, dhjetëra plagosje dhe vënie gjobash.