Kryetari i Partisë Demokratike, Sali Berisha, në konferencën e përjavshme me gazetarët, e cila është e fundit për këtë vit, teksa ka bërë një rezyme të ngjarjeve të ndodhura në vendin tonë, teksa është fokusuar kryesisht te qëndrimi i ambasadores amerikane, e cila sipas tij bëri gjithçka që t’i diktojë opozitës kryetarin e saj.
“Në këtë përpjekje, do të nxijë në historinë e turpit, qëndrimi i ambasadores së SHBA, e cila, pasi në një akt madhor korruptiv, kishte mashtruar qeverinë e saj për korrupsionin imagjinar të Sali Berishës, bëri gjithçka që t’i diktojë opozitës, kryetarin e saj. Përdori, abuzoi dhe shpërdoroi, duke shkelur çdo ligj të këtij vendi dhe vendit të vet, çdo konventë ndërkombëtare, çdo parim. Përdori fuqinë e vendit të saj, për t’i diktuar opozitën kryetarin“.
Kurse viti 2022 për të është viti i opozitës, sepse për herë të parë në historinë e vendit u aplikuan primaret. Berisha tha edhe se PD-ja iu përgjigj kësaj dhune të turpshme, antiligjore dhe antikombëtare me armën e lirisë.