Kreu i Partisë Demokratike Lulzim Basha në një dalje për mediat tha se policia është kthyer në bandë dhe se shteti ka rënë.
Ai përmendi dy ngjarje të një dite më parë, atë te Bregu i Lumit, ku policia sipas tij ndërhyri me gaz lotsjellës e me forcë ndaj banorëve, dhe grabitjen në Rinas.
“Kjo ndodh kur Shqipëria është bërë qendër e krimit ndërkombëtar sipas DASH, ku jo vetëm nuk ju thotë po po nxitet pastrimi i parave të krimit nga qeveria. Arsyeja dhe shkaku kryesor i rënies së shtetit, i mungesës së sigurisë për jetën dhe pronën e qytetarëve është pakti mes krimit dhe qeverisë ilegjitime të ardhur në pushtet me ndihmën e krimit”, tha Basha.
Sipas tij, sot është emergjencë kombëtare dhënia fund këtij regjimi, prandaj opozita proteston “të shtunën më 13 prill në Tiranë. Rruga e vetme për zgjidhjen e kësaj emergjence kombëtare, për kthimin e shtetit si garantues është bashkimi i gjithë shqiptarëve në betejeën kundër padrejtësisë, për sigurinë jetën e mirëqënien e çdo shqiptari”, tha mes të tjerash kreu i PD-së.