Erion Veliaj, i ftuar mbrëmjen e sotme në Studio Sport me Vilma Mashën ka folur për dëshirën e tij pas përfundimit të mandatit të tretë si kryetar i Bashkisë së Tiranës.
Veliaj nuk e ka përjashtuar mundësinë e kalimit për më lartë në politikë, por theksoi se do t’i pëlqente që të bëhej pjesë e botës akademike.
Mësimdhënia dhe ndarja e dijeve me të tjerët është një dëshirë e kryebashkiakut, por mbetet për tu parë zgjedhja që do të bëjë Veliaj pas përfundimit të mandatit.
“Do më pëlqente shumë pasi të mbaroj këtë mandate të tretë t’i rikthehesha akademisë, auditoreve. Do doja shumë të jepja mësim. Nuk e di nëse do vazhdoj më lartë në politik, por do më pëlqente që të jepja mësim. Unë besoj se kush vjen pas nesh në secilën prej detyrave tona, nuk është e thënë që duhet të bëjë të njëjtat gabime. Le të bëjë gabime të reja. Por nëse mund të evitojë ca gabime që ke bërë ti kjo vjen nga arti i mësim dhënies, ku t’i ndan dijet me të tjerët. Do kisha qejf ta bëja një ditë”, tha Veliaj.