Ministri i Drejtësisë, Ulsi Manja, gjatë konferencës për analizën e punës për vitin 2022 dhe planin për 2023, u pyet në lidhje edhe me mbipopullimin në burgjet e vendit dhe masat që po merren. Ai tha se është e vërtetë që në sistemin e burgjeve numri i të paraburgosurve tejkalon numrin e të dënuarve dhe sa i përket paraburgimit në kemi një mbipopullim.
“Sistemi i drejtësisë do duhet t’i parashohë të gjitha masat. Por kjo është pjesë e përgjegjësisë së sistemit të drejtësisë. Me fillimin e punës shpresojmë të ecin proceset gjyqësore dhe ne të lirohemi nga kjo ngarkesë”,-tha Manja.
Duke folur për Amnistinë Penale, Manja tha se ky është një mekanizëm për uljen e mbipopullimit të sistemit të burgjeve, ndërsa bëri me dije se për vitin 2023, një nga objektivat e dikasterit që ai drejton është që t’i propozojnë Parlamentit miratimin e një amnistie penale.
“Amnistia penale është një mekanizëm për uljen e mbipopullimit të sistemit të burgjeve. Për vitin 2023 në objektivat tona është që ti propozojmë Parlamentit miratimin e një amnistie penale”.