Nëse duhen besuar të dhënat më të fundit të Organizatës Botërore të Shëndetësisë (OBSH), gjysma e të gjitha kancereve që i atribuohen alkoolit në Rajonin Evropian të OBSH-së shkaktohen nga konsumi “i lehtë” dhe “i moderuar” i alkoolit, më pak se 1.5 litra verë ose më pak se 3.5 litra birrë ose më pak se 450 mililitra pije alkoolike në javë.
Me fjalë të tjera, nuk ka asnjë kufi të sigurt kur bëhet fjalë për alkoolin, sqaroi OBSH teksa publikoi deklaratën e saj për The Lancet Public Health. Alkooli është klasifikuar si kancerogjen i Grupit 1 nga Agjencia Ndërkombëtare për Kërkimin e Kancerit dekada më parë.
Deklarata e re e OBSH-së sqaron se: “Provat e disponueshme aktualisht nuk mund të tregojnë ekzistencën e një pragu në të cilin efektet kancerogjene të alkoolit ‘ndizen’ dhe fillojnë të shfaqen në trupin e njeriut”. Për më tepër, asnjë studim nuk mund të demonstrojë efektet e mundshme të dobishme të pirjes së lehtë dhe të moderuar në sëmundjet kardiovaskulare dhe diabetin e tipit 2 që tejkalojnë rrezikun e kancerit të lidhur me këto nivele të njëjta të konsumit të alkoolit për konsumatorët individualë.
“Individët mund të ushtrojnë gjykimin e tyre nëse mund të dëshirojnë të konsumojnë sasi të vogla alkooli për të shoqëruar një vakt të shëndetshëm, por ata duhet të jenë plotësisht të vetëdijshëm për rreziqet shëndetësore që do të rriten me rritjen nivelit të alkoolit në gjak”, thotë Dr K Srinath. Reddy, profesor i nderuar, Fondacioni i Shëndetit Publik të Indisë (PHFI).
“Efektet e dëmshme të konsumit të alkoolit shtrihen në një gamë të gjerë të mosfunksionimeve strukturore dhe funksionale në shumë organe të trupit. Përveç kancereve në vende të ndryshme, sëmundjet kardiovaskulare, sëmundjet e mëlçisë, çrregullimet e shëndetit neurologjik, dhe forma të tjera të lëndimeve dhe dhunës janë të lidhura me alkoolin. Edhe sasitë e vogla të alkoolit mund të shqetësojnë funksionin e trurit duke ndikuar në transmetimin neuronal. Disa efekte janë të përkohshme, por shumë prej tyre shkaktojnë dëme afatgjatë”, paralajmëron Dr Reddy.