Sekretari i Përgjithshëm i Partisë së Lirisë, Tedi Blushi akuzon këtë të enjte kryebashkiakun e Tiranës, Erion Veliaj për mosmbajtjen e premtimit për të strehuar familje të zonës së Kombinatit që u prekën nga tërmeti i 26 nëntorit të 2019-ës.
“Zona e Kombinatit pësoi dëmtime të rënda nga tërmeti i 26 nëntorit 2019 dhe si pasojë rreth 1500 familje mbetën të pastreha. Familjet e prekura nga tërmeti nuk i kanë ende në dorë çelësat e banesave të reja, pavarësisht premtimeve të shumta nga kryebashkiaku i Tiranës, Erion Veliaj.
As shorti për këto familje nuk është zhvilluar, duke shënuar një premtim tjetër të shkelur. Nga verifikimi në terren rezulton se ka ende shumë punë deri në përfundimin e pallateve, një pjesë për të cilët sapo ka filluar.
Në 22 qershor 2022, kryetari i Bashkisë së Tiranës, Erion Veliaj deklaroi se brenda vitit 2022 do të futeshin në banesa familjet e para, të prekura nga tërmeti në zonën e Kombinatit. Nga një verifikim në terren në zonën e Kombinatit, për të parë nga afër si po ecën procesi i ndërtimit të pallateve, rezulton se puna nuk ka përfunduar dhe ende asnjë familje nuk është strehuar aty. Çdo ditë do t’i kujtojmë Erion Veliaj nga një premtim të pambajtur dhe do t’i faktojmë konkretisht mashtrimet e tij”,-u shpreh Blushi.