Pica italiane është bërë më e shtrenjtë, ndërkohë që inflacioni në vend është në pragun e 12.3% kryesisht si pasojë e rritjes së çmimit të energjisë dhe ushqimeve bazë. Krahasuar me një vit më parë, kostoja mesatare e një “Margherita” të thjeshtë u rrit me gati 30% në dhjetor.
Analiza e ushqimit të preferuar tradicional italian zbulohet nga indeksi i ri mujor i “Pizza Margherita” i Bloomberg, i cili synon të japë një pasqyrë të rritjes tronditëse të kostos së jetesës për italianët duke vlerësuar përbërësit në përgatitjen e një prej vakteve më të njohura dhe më të thjeshta në Itali.
Duke mbledhur të dhëna nga instituti kombëtar i statistikave të Italisë dhe ministria e financave, matësi gjurmon çmimet në rritje të përbërësve kryesorë – miell, domate, djathë mocarela dhe vaj ulliri. Është llogaritur edhe konsumi i energjisë elektrike që nevojitet për të gatuar një picë me një furrë elektrike shtëpiake.