Drejtoresha e Autoritetit Rrugor Shqiptar, Sonila Qato, ka folur në studion e ERTV-së për investimet në infrastrukturë që pritet të përfundojnë brenda vitit 2019, për të garantuar një ndërlidhje më të mirë dhe të sigurtë për qytetarët shqiptarë.
Qato theksoi se brenda 17 Majit do të dorëzohet e plotë rruga Tiranë Elbasan, korsia e parë e së cilës u hap në 14 Mars.
Ndërkohë është realizuar rehabilitimi i rrëshqitjes pas tunelit të kësaj rruge, e cila është korrigjuar përmes një tuneli panoramik që pritet të hapet në datë 29 Prill.
Shumë shpejt do të përfundojë gjithashtu infrastruktura e veprave të artit në rrugën kryesore Kukës-Morinë, e cila do të pajiset me të gjitha elementët e sigurisë rrugore.
Shumë shpejt-njoftoi Qato- përfundojnë edhe Elbasan-Banjë me dy lote, si edhe loti i parë i Skrapar- Përmet.
Sipas Qatos, kontraktori për ndërtimin e bypass-it të Fierit është duke punuar me ritme shumë të larta për të mbajtur premtimin e hapjes së një korsie për automjetet brenda 30 Qershorit 2019.
Qato njoftoi se jemi duke punuar për aksin kombëtar adriatiko – jonian dhe të gjitha projektet e sotme janë në mbështetje të këtij projekti që do të lidhë të 6 vendet e ballkanit perëndimor
“Ndaj për segmente si bypassi i Vlorës, ndërtimi i rrugës së Delvine – Kardhiq ku ne shumë shpejt do të hapim procedurën për lotin 7, pra ndërtimin e tunelit, jemi duke operuar për t’i realizuar në kohë reale këto vepra, që në pranverë 2021 të jenë gati”, tha ajo.
Qato shtoi se ARRSH monitoron çdo ditë grafikun e punimeve në këto akse, që të realizojmë punimet brenda vlerës së kontratave të prokuruara, me qëllim që asnjë lek nga buxhetit i shtetit të mos shkojë për shtesa punimesh.