Arabia Saudite është e gatshme që të paguajë për stadiumet e reja në Greqi dhe Egjipt, nëse të tri shtetet bëhen bashkë që të aplikojnë për të organizuar Kupën e Botës 2030. Në garë për mbajtjen e eventit janë edhe Spanja, Portugalia dhe Ukraina, si edhe shtetet amerikano-latine të Argjentinës, Uruguait, Paraguajit dhe Kilit.
Vendimi për shtetet organizatore do të votohet nga kongresi i FIFA-s në vitin 2024. Sipas gazetës “Politico”, oferta e Arabisë Saudite është që në territorin saj të organizohen 75% të ndeshjeve. Edhe pse kjo do t’i kushtonte miliarda Dollarë vendit të Gjirit, sërish Mbretëria është gati që të paguajë.
Nisur nga fakti që Kupa e Botës 2022 u organizua në Katar, të shumtë do të ishin kundërshtuesit që eventi të çohej sërish në Lindjen e Mesme pas tetë vitesh. Pikërisht për këtë arsye, Arabia Saudite po përdor dredhinë duke paraqitur një propozim që Kupa e Botës të oganizohej në tri kontinente.
Ideja saudite u diskutua mes Mohammed bin Salman – Princit të Kurorës së Arabisë Saudite dhe Kryeministrit grek, Kyriakos Mitsotakis në verën e 2022. Është ende e paqartë nëse oferta u pranua apo jo nga Greqia dhe Egjipti, por mendohet se luajtja e turneut në tre kontinente do të rriste shanset e tyre për sukses.