Strukturat e Partisë Socialiste në shumë bashki të vendit kanë nisur përgatitjet për zgjedhjet lokale të 14 majit 2023. Drejtuesit politik të qarqeve, deputetët, kryetarët e bashkive, kryetarët e Asambleve Socialiste, të deleguarit janë angazhuar kudo për të maksimalizuar votat për Partinë Socialiste.
Socialistët e Matit kanë zhvilluar sot një takim me strukturat e PS-së bashkisë. Kryetari i PS Mat Hasan Pasha dhe kryebashkiaku Agron Malaj kanë dhënë detyra konkrete për bashkëkryetarët e OS-ve, të deleguarit, koordinatorët dhe çdo antar të Partisë Socialiste. “Jemi këtu për të vijuar punët e nisura në sektorët jetikë, ujësjellësa, rrugë, objekte publike, infrastrukturë, mjedis, etj”, theksoi kryetari i Bashkisë Mat, Agron Malaj. Ai falenderoi strukturat për mirëorganizimin e fushatës së radhës dhe i garantoi qytetarët matjanë se projekte të tjera do të jetësohen në këtë trevë.
Mbi 300 gra dhe vajza lezhjane kanë deklaruar mbështetjen e tyre për PS-në. Kryetari i Bashkisë Lezhë Pjerin Ndreu tha se: “Ballafaqimi i dy modeleve 2015-2019 me atë 2019-2023 tregon qartë orjentimin drejt punës dhe zhvillimit që ne kemi injektuar këto 4 vite. Kthimin pas nuk e pranon askush më sepse është regres dhe askush nuk do ta votojë.” Në takimin e organizuar në Lezhë ishte edhe ministri Drejtësisë Ulsi Manja.
Po sot pasdite kryetari i bashkisë Bulqizë Lefter Alla është takuar me strukturat e PS-së Fushë Bulqizë. “Jemi në këtë njësi vendore, tha Alla, për të bërë një bilanc të punës sonë deri më tani dhe për të diskutuar rreth angazhimeve që na presin më tej. Gati drejt sfidës së radhës dhe të bindur për fitoren e 14 majit”, deklaroi ai.