Ministri i Mbrojtjes, Niko Peleshi priti këtë të hënë efektivët që u kthyen nga misioni në zonat e shkatërruara nga tërmeti i 6 shkurtit në kufirin mes Turqisë dhe Sirisë.
Teksa shprehu mirënjohjen në emër të Ministrisë së Mbrojtjes për punën dhe angazhimin në terren që në momentet e para, Peleshi tha se vlerësime maksimale për stafin shqiptar ka marrë edhe nga pala turke.
“Ne kemi treguar në histori, e treguam edhe këtë herë me gjestin tuaj se ne jemi pranë popujve të tjerë në ditë të vështira si ky rast. Unë dua t’ju falënderoj nga zemra në emër të ministrisë, qeverisë dhe popullit për përfaqësimin dinjitoz që i bëtë Shqipërisë në këtë mision me risk. Sikur qoftë edhe një jetë kemi mundur të shpëtojmë nuk ka të paguar”, u shpreh ministri Peleshi.
“Kemi qenë vendi i parë që reaguam dhe u ofruam në thirrjen e Mekanizmit Evropian të Mbrojtjes Civile. Ishte një moment i rëndësishëm për ne, sepse ishte hera e parë pas anëtarësimit, ku ne u angazhuam për të dhënë kontribut dhe jo për të kërkuar mbështetje. E treguam përmes punës tuaj, sakrificës suaj. Treguam që jemi pjesë e rrjetit të partnerëve të aleancës së madhe, qoftë në NATO, qoftë në Mekanizmin Ervopian të Mbrojtjes Civile jemi edhe për të kontribuuar”, theksoi ministri i Mbrojtjes.