Kreu i Partisë Demokratike Sali Berisha ka zhvilluar një tjetër takim këtë të Martë me strukturat drejtuese të degëve të kësaj force politike.
Në fjalën e tij, Berisha u bëri thirrje qytetarëve që t’i bashkohen protestës së 3 Marsit. Ai theksoi se ajo ditë nuk përbën një lëvizje partiake, por qytetare.
“Ne duhet të flasim, duhet ti japim përgjigjen e merituar Edi Ramës, përndryshe të këqijat që ai ka bërë do harrohen në krahasim me atë që do u bëjë Shqipërisë e shqiptarëve. Do duken lule këto në krahasim me të tjerët që do të bëjë. Nuk ka moral nuk ka asnjë normë, nuk ka ligj që njeh. Këto ditë që na kanë mbetur të bëjmë gjithçka për të dalë sëbashku me çdo të njohur, me cilindo që duam, që besojmë se duhet të bashkohet me ne, nuk është lëvizje partiake por qytetare. Të çdo shqiptari sepse pasojat e këtij regjimi janë masive, jo vetëm mbi demokratët, mbi ata pa parti dhe socialistët e ndershëm. Fëmijët po u ikin të gjithëve, të gjithë po përballen me jetën e vështirë. Të shtrijmë dorën, të bashkohemi.
Mos të harrojmë se ne detyrimisht fitojmë si shumicë, dhe është në dorën tuaj, përkushtimin tuaj të bindni sa më shumë bashkëqytetarë në këtë betejë. Nuk kemi asgjë të stisur, kemi gjithçka të vërtetë të pamohueshme, absolutisht. Dhe e vërteta më e hidhur është urrejtja e përçmimi që kanë këta hajdutë për ju. Hajduti gjithmonë urren viktimën e tij dhe në urrejtjen që ushqen ndaj viktimës justifikon aktin e tij”, u shpreh Berisha./