Dita e diel është shpallur ditë zie kombëtare në shenjë dhimbjeje e lutjeje për viktimat e aksidentit në Greqi.
Vendimi është bërë i ditur nga vetë kryeministri Edi Rama, i cili njoftoi se këtë fundjavë do të ulet flamuri në gjysmë shtizë.
“Tragjedia e Greqisë është edhe tragjedia jonë, dhimbja për jetët e humbura në aksidentin e tmerrshëm është edhe jona dhe ky është një nga ato momente jetësore, kur një humbje e madhe tek fqinji të tregon më shumë se sa njëqind gëzime që jetët tona janë të ndërlidhura pazgjidhshmërisht, e se duhet të bëjmë çmos që t’i bëjmë ato sa më të mira, duke bashkëpunuar gjithnjë e më shumë me njëri-tjetrin. Ditën e dielë Shqipëria do të nderojë me një ditë zie viktimat e tragjedisë, duke u bashkuar simbolikisht me Greqinë mike me flamurin kombëtar të ulur në gjysëm shtize”, shkruan kreu i qeverie.
Bilanci i viktimave nga aksidenti tragjik në tempi të Greqisë, ku dy trena u përplasën me njëri tjetrin është shtuar. Të paktën 47 persona raportohet se kanë humbur jetën si pasojë e goditjes së fortë, teksa trupat e shpëtimit po vazhdojnë kërkimet për 19 pasagjerë të tjerë, që janë raportuar si të zhdukur, mes tyre dhe 4 shqiptarë.