Protestuesit po mblidhen në sheshin Skënderbej dhe para selisë blu. Në ora 12.00 fillon edhe protesta e thirrur nga Sali Berisha para Kryeministrisë. Dita e sotme është e rëndësishme për PD pasi pritet të jepet vendimi për vulën e partisë opozitare më të madhe në vend.
Më herët kreu i Partisë Demokratike Sali Berisha ka theksuar se revolucioni opozitar nuk do të ndalet deri në rikthimin e demokracisë dhe votës së lirë në vend. Dy variante dalin nga skutat e selisë së PD. Nëse Gjykata e Apelit jep vendimin në favor të Berishës, protesta do jetë e qetë. Por nëse vendimi shkon kah Enkelejd Alibeajt atëherë nuk dihet përfundimi dhe tymi në Tiranë.
Protesta e thirrur për në orën 12:00 nga opozita ka vënë në gatishmëri policinë e shtetit. Mbi 1100 forca të policisë, duke nisur nga ato të rendit, FNSH dhe Garda e Republikës, do të jenë në terren për mbarëvajtjen e protestës.
Si në çdo protestë do të krijohet kordoni me efektivë policie para Kryeministrisë dhe perimetrit rreth saj. Në terren do të përfshihen edhe agjentët civilë, për të monitoruar mbarëvajtjen e protestës. Ndërkohë, si në çdo tubim, dyert e kryeministrisë janë blinduar me veshje metalike. Policia ka instaluar përgjatë gjithë bulevardit ‘Dëshmorët e Kombit’ kamera me rezolucion të lartë.