Ministrja e Financave, Delina Ibrahimaj, në përfundim të mbledhjes së qeverisë, bëri publike miratimin e huasë së ratifikimit të marrëveshjes për projektin e zhvillimit të integruar rajonal, projekt, që sipas Ibrahimajt, do të prekë Bashkitë Pogradec dhe Pustec.
E pyetur nga gazetarët nëse do të ketë shpërblime për pensionistët në muajin prill, ministrja Ibrahimaj u shpreh për momentin qeveria nuk ka përcaktuar një politikë të dhënies së një shpërblimi të menjëhershëm për pensionistët në muajin prill.
A do ketë shpërblime në prill për pensionistët dhe shtresat në nevojë, sikurse është paralajmëruar, si pjesë e pakos së madhe të qeverisë?
“Ne kemi të parashikuar në buxhet për këtë vit një fond që i dedikohet mbështetjes sociale. Ne po punojmë për rritjen e pagave dhe do të synojmë që të rriten gjatë vitit, jo vetëm për administratën publike, por edhe ato në sektorin privat. Një hap të rëndësishëm që ndërmorëm ishte rritje e pagës minimale. Sa i përket pensioneve ne kemi një politikë për indeksimin e pensioneve në bazë të inflacionit. Ne do të vijojmë me këtë politikë, me qëllim që të gjithë efektet e krizës dhe çmimeve të shtuara prej inflacionit të luftës, të mos ketë ndikim në pensionin e pensionistëve. Për momentin nuk kemi përcaktuar një politikë të dhënies së një shpërblimi të menjëhershëm për muajin prill”,-tha ministrja.