Tetë ditë pasi Diana Bahçja solli në jetë foshnjen përfundoi në burg për një gjobë, dhe kjo ngjarje ka nxitur debat në seancën plenare këtë të enjte mes deputetëve të mazhorancës dhe opozitës. Deputetja e PD-së, Dhurata Çupi tha se duhej patjetër një debat me ministrin e Drejtësisë për këtë çështje, dhe se për të drejtësia në vend është e padrejtë.
“Është një ngjarje e rëndë, e dhimbshme , e rënde, dëshpëruese. Ne këtu duhet të kemi një seancë debati për ngjarjen e gruas lehonë në Shkodër që u arrestua. Ne duhet të kemi një diskutim me ministrin e Drejtësisë. S’duhet të ketë asnjë seancë tjetër përpos kësaj. Drejtësia është e padrejtë me njerëzit e thjeshtë. Këtu para disa ditësh s’ngeli deptet pa uruar 8 marsin për like dhe sot s’ka asnjë reagim. Kështu duhet të niste sot seanca plenare”,-tha Çupi.
Deputetja e PS-së, Klotilda Bushka tha se s’ka nevojë për debat ndërsa është shprehur se po merren masat. “Është i parashikuar qartësisht se një nënë lehonë s’mund të mbahej me një fëmijë në burg. Se ku ka çaluar çështja i takon organeve të drejtësisë, nuk ka nevojë për debat. Gjithsesi jemi në një mendje me ju, këto ngjarje nuk mund të ndodhin. Jemi mbledhur, kemi diskutuar dhe siç kemi vepruar gjithnjë do të bëjmë punën tonë që rastet e tilla mos të përsëriten. Thënë këtë nuk është hera e parë që ne do duhet të veprojmë dhe do të jemi të kujdesshëm. Marsi nisi me vrasjen e grave, erdhi i përgjakur. Dhe ne do të vijojmë të marrim masat përkatëse me çfarë mund të bëjmë më mirë”,-thotë Bushka.