Edvin Kulluri: Vjehrri i Këlliçit, arkitekti i kullave në Tiranë, Belindi tregon mungesë integriteti

Ish-anëtari i Këshillit Kombëtar të PD-së, Edvin Kulluri, komentoi sot kandidaturën e Belind Këlliçit për Bashkinë e Tiranës. Duke folur në ABC, Kulluri deklaroi se Këlliçi nuk po bën fushatë dhe se nuk po tregon integritet. I pyetur për vjehrrin e tij socialist, analisti theksoi se kjo është fatale për Këlliçin.
“Këlliçi nuk ka fushatë. Nuk shoh teza, një set propozimesh për Tiranën nën drejtimin e Këlliçit. Deri tani shikoj negativizëm ndaj Veliajt. Këlliçi nëse ka dalë me të drejtë si kandidat i asaj partie që sulmon bashkinë e Tiranës në vijimësi për betonizimin e qytetit, duhet të përmendur edhe emrat e atyre që ka përmendur lejet e drejtimit.
Ti nuk mundet të sulmosh po themi VKM-në e PS-së, për kontrollin teknik të godinave 50-vjeçare, nëse janë të rrezikuara nga tërmetet dhe mos të sulmosh atë që del e mbron në televizion dhe atë që e shkruan vendimin e qeverisë. Kjo është ajo që kam folur para nja 2 muajsh për mungesën e integritetit të zotit Këlliçi. Të hysh në garë për Tiranën, do integritet. Do që ta çosh kokën dhe ta shikosh me sy qytetin, qytetarët dhe mbi të gjitha rivalin tënd. Kur ti shikon rivalin, por nuk përmend ata që janë në krah të rivalit, apo mbas rivalit, kjo tregon që ti ke frikë, ke droje, sepse në vetvete zoti Këlliçi, është me të drejtë i kompleksuar absolutisht. Askush nuk i hyn në jetën e tij private. Por njeriu duhet të bëjë disa zgjedhje, midis jetës private dhe asaj publike, mirë është që të mos jesh i detyruar të zgjedhësh”, tha Kulluri.