Presidenti Bajram Begaj dekretoi emërimin e znj. Vlora Hyseni si drejtuese të Shërbimit Informativ të Shtetit.
Hyseni u propozua disa ditë më parë nga kryeministri Edi Rama. Ajo ka mbajtur postin e drejtoreshës për marrëdhënie me jashtë në Agjencinë e Kosovës për Inteligjencë.
Gjithashtu Hyseni ka drejtuar për katër muaj Agjencinë e Kosovës për Inteligjencë, nga dhjetori i 2020-ës, kur u shkarkua drejtori Kreshnik Gashi, deri në prill të 2021-shit, kur u emërua drejtori i ri.
Por, në 30 qershor të 2021-shit, ajo u shkarkua nga presidentja Vjosa Osmani dhe kryeministri Albin Kurti, të cilët njoftuan se duhet të dorëzojë mjetet dhe materialet që ka pasur në ruajtje.