Gjatë prezantimit të kandidatit të koalicionit “Bashkë Fitojmë” për zgjedhjet e 14 majit në Elbasan, Flamur Noka akuzoi kryeministrin Edi Rama dhe qeverinë se duan që ta bëjnë Elbasanin “tokë të djegur”.
Sa i përket kryebashkiakut aktual, Gledian Llatja, deputeti demokrat e quajti “kukull të Ramës”.
“Si përfundoi ky qytet që më parë nxirrte elita që i jepte zë vendit? Ky ka qenë program i detajuar i Edi Ramës dhe Rilindjes. Ata kanë pasur synim në qytetar të vogël për ta sunduar më lehtë. Ky eksperiment po hyn në vitin e 10-të tij. Sot Rama dhe Rilindja kanë marrë çdo gjë, kontrollojnë shumë gjëra, por kanë harruar se nuk mund të kontrollojnë lirinë dhe energjinë tuaj. Kanë sjellë këtu në Elbasan një kukull që e kanë zhytur në batak. Jemi këtu dhe është koha t’ju themi se kurrë nuk mund të marrin votën tonë. Vota juaj është e shenjtë, pasi në demokraci vjen bashkë me njeriun, por Rilindja dhe Rama kanë ndërhyrë kudo. Kanë bërë dëme pafund në Elbasan dhe kudo. Duan ta bëjnë tokë të djegur që të rinjtë të largohen dhe të mos funksionojnë. Dëme të pafundme ka bërë Rama. Sado të duken të fuqishëm ata nuk e kanë forcën dhe energjinë tuaj për ndryshim, për të votuar Luçiano Boçin dhe koalicionin ‘Bashkë Fitojmë’. Ne kemi sjellim figurën më të mirë, profesorin Luçiano Boçin”, deklaroi Noka.