Autobusi i linjës së Institutit ka marrë flakë në lëvizje e sipër pasditen e kësaj të hëne në rrugën “Dritan Hoxha”, në kryeqytet.
Pasagjerët kanë arritur të dalin të gjithë jashtë dhe deri më tani nuk raportohet për asnjë person të lënduar. Ndërkohë policia po punon për të zbardhur ngjarjen.
“Me datë 10.04.2023, rreth orës 16:50, ka marrë flakë në lëvizje e sipër dhe është djegur pjesërisht në pjesën e motorit, autobusi i linjës së Institutit, me drejtues shtetasin S. A. Në vendin e ngjarjes kanë shkuar shërbimet e Policisë dhe shërbimet zjarrfikëse. Personat që ndodheshin në autobus kanë dalë nga autobusi dhe nuk ka asnjë të dëmtuar. Paraprakisht dyshohet se zjarri është shkaktuar aksidentalisht. Grupi hetimor po punon për zbardhjen e rrethanave të ngjarjes”, thuhet në njoftimin e policisë.