Në seancën e sotme në Kuvend, pati debate të forta mes deputetit socialist Pandeli Majko dhe deputetes demokrate, Jorida Tabaku. Në fjalën e tij, Majko tha se seanca plenare nuk duhet të kthehet në një fushatë elektorale. Ai ka ironizuar opozitën, duke cituar deklaratat e bëra më herët nga kryetari i komanduar i PD Enkelejd Alibeaj se opozita është pastruar nga servilët dhe se kanë kaluar në anën e PS.
“Përse thoni që ne po ndryshojmë programin dhe rendin e ditës ftoj zotin Leskaj të reagojë. Sot përfaqësuesi i partisë komuniste përfaqësohet nga partia juaj, citoj kryetarin tuaj që ka thënë se sot PD është pastruar nga servilët dhe i ka marrë PS, pra zonjën Jorida dhe Bardhin i kemi marrë ne?”, tha Majko.
Deputetja e PD-së, Jorida Tabaku tha se është një turp që përmenden emra kolegësh në sallë. “Por kur mosha dhe eksperienca keqpërdoren dhe përdoren emrat e kolegëve tanë, kjo është e turpshme. Mes jush turp është që përdorni debatin e PD në këtë Kuvend. S’ka nevojë që të them unë se sa punë bëj apo se kush është i shitur apo i blerë. Herë tjetër respekt për moshën dhe eksperiencën, kur përdor emra të kolegëve në Parlament”, tha Tabaku.