Selia e shtëpisë luksoze të modës “Louis Vuitton” është pushtuar sot për pak kohë nga protestuesit francezë gjatë mobilizimeve kundër planeve të presidentit Emmanuel Macron për reformën e pensioneve.
Sipas rrjetit francez “BFMTV”, rreth 400 mijë qytetarë kanë dalë në rrugët e vendit për të demonstruar edhe një herë kundërshtimin e tyre ndaj planit të qeverisë për reformimin e sistemit të sigurimeve.
Duke ndezur flakadanë dhe hedhur bomba tymuese në ndërtesën Avenue Montaigne në Champs Elysees, rreth 400 protestues u mblodhën jashtë zyrave të shtëpisë së modës për t’i dërguar mesazhin e tyre qeverisë, goditjen e simboleve të kapitalizmit dhe gjigantët e biznesit.
Videot u shpërndanë në mediat sociale.
Siç raporton gazeta franceze “Le Parisien”, kritikët e planit të presidentit Macron për të rritur moshën minimale të pensionit në 64 vjeç nga 62 që është aktualisht, iu përgjigjën thirrjes së sotme të sindikatave duke protestuar në Paris si dhe në qytete të tjera të vendit.
Demonstratat e sotme, komenton gazeta “Le Monde”, zhvillohen një ditë përpara se Këshilli Kushtetues i Francës të vendosë nëse procedurat e ndjekura nga qeveria e Parisit për reformën e sistemit të pensioneve ishin në përputhje me Kushtetutën.
Me fjalë të tjera, të aktivizohet neni 49 paragrafi 3 i Kushtetutës duke anashkaluar votimin në Asamblenë Kombëtare Franceze.