Deputetja e PD-së Jorida Tabaku ka reaguar pas vendimit të qeverisë për rritjen e pagave për sektorin publik. Tabaku ngre shqetësimin se kush do ta paguajë faturën, duke iu përgjigjur se barra do të bjerë mbi shqiptarët. Po ashtu, Tabaku u shpreh përmes një postimi në facebook, se Shqipëria renditet e fundit në rajon për pagën minimale e mesatare, për të ardhurat për frymë e për shumë tregues të tjerë.
“Ditën e sotme qeveria lajmëroi se do të rrisë pagat për sektorin publik. Një nismë shumë e vonuar duke pasur parasysh se konkurrenca e sektorit publik ka qenë e ulët në lidhje me pagat madje nën këtë qeveri për herë të parë në vite kemi pasur dhe rënie të pagës reale. Dëshmi se si të gjitha reformat e ndërmarra nga 2013 e këndej kanë rezultuar në flluskë sapuni, pasi sot në kohë të vështira duhet të tregonim rezistencë ndërsa tregojmë dobësim dhe dështim.
Pra, rritja e pagave mund të ishte (edhe duhet të ishte) kryer kohë më parë por reformat e kësaj qeverie nuk kanë pasur synim forcimin e administratës por tkurrjen e saj dhe dobësimin e saj. Sot, gjithsesi ministrja e Financave deklaroi se rritja e pagave do të vijë nga rritja e të ardhurave. Cilit zë të të ardhurave? Struktura e të ardhurave në vendin tonë e ka barrën më të madhe fiskale tek grumbullimi i TVSH-së, që ka filluar të bjerë si pasojë e uljes së konsumit. Ky i fundit, përmes reaksionit zinxhir, ka nisur të bjerë si pasojë e rritjes së çmimeve të inflacionit socialist”, tha Tabaku.