Gramoz Ruçi, një nga figurat kryesore të Partisë Socialiste, kolonë dhe institucion për strukturat drejtuese socialiste u shfaq ditën e djeshme sërish mes njerëzve të politikës.
Bashkë me shumë ish kolegë të tij politikanë, ai mori dje pjesë në Iftarine shtruar nga Kryeministri Rama në Pallatin e Kongreseve.
Sikurse mund të shihni dhe nga këto foto të sigurruara nga tirananews, Ruçi ishte në një tavolinë me Sekretarin e Përgjithshëm të PS Damian Gjiknuri, deputeten Blerina Gjylameti dhe socialistin e vjetër Musa Ulqini.
Largimi nga politika
Ruçi do të dorëhiqej nga politika menjëherë pas fitores së zgjedhjeve nga PS dy vite më parë, në një ditë që përkonte dhe me 30-vjetorin e kësaj force politike. “Do deklaroj fundin e kësaj maratone dhe si çdo maratone ka startin dhe finishin, prandaj kam zgjedhur që s’ka më mirë se në këtë 30 vjetor të PS, s’ka më mirë që sot që kemi fituar këtë mandat të drejtë, pas disa muajsh mbush 70 vjeç që të deklaroj para jush se në 9 shtator që fillon legjislatura e re nuk do të ushtroj mandatin që më ka dhënë PS dhe se nuk do të kem ambicie për të qenë në asnjë organ ekzekutiv të familjes sime. Prandaj për ta mbyllur falënderoj Nanon dhe Ramën që e kam pasur privilegj të jem bashkëpunëtori i tyre. Të falenderoj të gjithë”, tha Ruçi.
Kush është Gramoz Ruçi
Gramoz Ruçi ka lindur në Tepelenë, më 6 dhjetor 1951. Studimet e larta i kreu në Institutin e Lartë Pedagogjik, dega Bio-Kimi. Nga viti 1971 deri në vitin 1978 ka ushtruar profesionin mësuesit në Progonat. Ruçi e ka nisur veprimtarinë politike që në vitin 1978 si pjesë e Partisë së Punës. Në vitin 1988, Gramoz Ruçi u emërua Sekretar i Parë i Partisë së Punës i rrethit të Tepelenës. Në periudhën shkurt-qershor të vitit 1991 Gramoz Ruçi ka qenë Ministër i Punëve të Brendshme. Kjo ishte edhe detyra e tij e fundit në postet ekzekutive.
Në qershor të vitit 1991, Gramoz Ruçi ishte një ndër themeluesit kryesorë të Partisë Socialiste. Nga themelimi i PS-së deri në vitin 1999 Ruçi ishte Sekretar Organizativ i Partisë Socialiste. Gjithashtu, nga viti 1992 deri në vitin 1999 Ruçi ishte kryetar i grupit parlamentar të PS-së. Gjithashtu, Ruçi, gjatë periudhës qershor 1991 deri në qershor 1999, ishte edhe Sekretar i Përgjithshëm i PS‐së.
Momentet e vështira për Gramoz Ruçit ishin në vitin 1996, ku u përndjekur nga Sali Berisha dhe pushteti i tij me natyrë kriminale, iu desh të ikte si refugjat ekonomik në Greqi, deri në vitin 1997, kur Berisha ishte përmbysur nga pushteti dhe bashkëpunëtorët e tij ishin arratisur. Ruçi ishte një nga bashkëpunëtorët më të ngushtë të liderit të parë të PS, Fatos Nano dhe më pas një nga mbështetësit kryesorë dhe këshillues i Edi Ramës, që nga viti 2005 deri më sot, siç edhe deklaroi edhe Rama në fjalimin e tij në Kongresin e PS-së.
Nga viti 2010 deri në vitin 2017, Gramoz Ruçi ka mbajtur postin e kryetarit të Grupit Parlamentar të PS-së. Nga viti 2010 deri në vitin 2017, Ruçi ka mbajtur edhe postin e kryetarit të Asamblesë Kombëtare të PS-së si dhe ishte pjesë e forumeve më të larta të PS. Në shtator të vitit 2017, Gramoz Ruçi dha dorëheqjen nga të gjitha funksione drejtuese në Partinë Socialiste, duke u pasuar nga Taulant Balla. Pas dorëheqjes nga funksionet partiake, në vjeshtën e vitit 2017, Gramoz Ruçi u zgjodh kryetar i Kuvendit të Shqipërisë.
