Kreu i Partisë së Lirisë, Ilir Meta, në një takim të zhvilluar me gra dhe vajza në Njësinë nr 9 në kryeqytet ka komentuar situatën e rëndë sipas tij të ekonomisë dhe ndërtimeve në kryeqytet. Meta habiti kur tha që ka një dyshim se qeveria dhe bashkia ngadalësojnë trafikun në kryeqytet që makinat të harxhojnë më shumë dhe të përfitojnë karburantet.
“Ekziston dyshimi se është ngadalësuar lëvizja e makinave që të harxhojnë më shumë karburant. Që të përfitojnë karburantet. Një makinë harxhon më shumë duke ecur 3-4 kilometra në orë apo jo”, tha Meta.
Ai komentoi edhe kërcimet e Kryeministrit Rama në takimet elektorale teksa prezanton kandidatët për kryebashkiakë.
“E keni parë si kërcen? Mos u habisni kur të kërcejë edhe lakuriq. Ai po godet në palcë shtresën e mesme të shoqërisë. Një mësues shqiptar këtu në Shqipëri merr 4200 euro në vit, një mësues shqiptar në Plavë e Guci merr 9200 euro. Këta habiten se si do t’i gjejë lekët ky për autobusët falas. Se habiten këta të gjesh lekë për 200 mijë njerëz çdo ditë. Shpenzimet e urbanit falas janë sa gjysma që paguhet për inceneratorët që nuk ekzistojnë. Këta janë të marrë me atë që po bëjnë me ndërtimet. Janë gati të hapin ndërtim të pallatit mbi pallat”, tha kryetari i Partisë së Lirisë, Ilir Meta.