Policia e Pogradecit ka vënë në pranga 30-vjeçarin Mario Xhangolli, një person i shpallur në kërkim për dy ngjarje kriminale të ndodhura gjatë muajve të fundit.
“Më datë 01.03.2023, Xhangolli në bashkëpunim me dy vëllezër kanë kanosur një 37-vjeçar, të cilit i dëmtuan edhe xhamat e automjetit. Gjithashtu më datë 18.04.2023, në aksin rrugor “Korçë-Pogradec”, pranë vendit të quajtur Qafë Plloçë, për motive të dobëta, përplasën qëllimisht, me automjetin e tyre tip “Hummer”, automjetin e një 39-vjeçari. I shoqëruar dhe nga shtetasi, Sindi Syzo, pas përplasjes së automjetit dy personat në fjalë kanë dalë jashtë dhe kanë kërcënuar dhe kanosur 39-vjeçarin.
Gjatë largimit, Xhangolli dhe Syzo, kanë përplasur një tjetër mjet. Ata janë detyruar të braktisin automjetin e tyre pas aksidentit dhe të largohen në drejtim të paditur me këmbë. Polica po vijon punën për kapjen e 2 bashkëpunëtorëve, të tjerë të 30-vjeçarit. Materialet procedurale i kaluan Prokurorisë pranë Gjykatës së Rrethit Gjyqësor Pogradec, për veprime të mëtejshme”.