Rusia ka akuzuar Ukrainën se u përpoq të sulmonte me dronë Kremlinin, godinën presidenciale në Moskë. Sipas medias ruse “Ria Novosti”, Presidenti Putin nuk ka pësuar asnjë dëmtim nga përpjekja e ukrainasve.
“Dy mjete ajrore pa pilot u drejtuan nga Kremlini. Si rezultat i veprimeve në kohë të ndërmarra nga ushtria dhe shërbimet speciale duke përdorur sisteme luftarake me radar, pajisjet u çaktivizuan”, thuhet në njoftimin e bërë nga administrata presidenciale botuar në “Ria Novosti”.
Si pasojë e sulmit, presidenti dhe persona të tjerë nuk u lënduan dhe orari i punës së kreut të shtetit nuk ndryshoi.
Kremlini i konsideroi këto veprime si një akt të planifikuar terrorist dhe një atentat ndaj presidentit në prag të Ditës së Fitores dhe paradës së 9 majit.
Qeveria e Ukrainës nuk vonoi të reagonte pas akuzave të Kremlinit.
Mediat e huaja shkruajnë se një zyrtar i lartë presidencial ukrainas ka thënë se Ukraina nuk ka “asgjë të bëjë me” sulmin me dron.
Ndër të tjera në reagimin e tyre autoritetet e Ukrainës theksuan se një sulm ndaj Kremlinit nuk do të “ndryshonte asgjë në fushën e betejës” dhe ndoshta do të “provokonte Rusinë të ndërmarrë veprime “më radikale“.